ប្រែសម្រួល៖ រតនា
ពិភពលោកកំពុងពិនិត្យមើលអំពីទិសដៅជាសក្តានុពលនៃទំនាក់ទំនងរវាងអាមេរិក-ចិន ក្រោមរដ្ឋបាលប្រធានាធិបតីជាប់ឆ្នោតលោក Donald Trump ដោយផ្តោតលើសមាសភាពគណៈរដ្ឋមន្ត្រីរបស់លោក និងការឆ្លើយតបដែលអាចកើតមានពីប៉េកាំង។
ក្រុមការងាររបស់លោក Trump រួមមានមន្ត្រីជាច្រើនដែលគេស្គាល់ថាមាន “ជំហរតឹងរ៉ឹងចំពោះចិន” ដែលគាំទ្រឱ្យមានជំហរប្រឈមមុខគ្នាលើបញ្ហាសេដ្ឋកិច្ច សន្តិសុខ និងការទូត ជាមួយចិន។ មន្ត្រីសំខាន់ៗរួមមានទីប្រឹក្សាសន្តិសុខជាតិ Mike Waltz រដ្ឋមន្ត្រីការបរទេស Marco Rubio និងរដ្ឋមន្ត្រីការពារជាតិ Pete Hegseth ដែលម្នាក់ៗត្រូវបានគេកត់សម្គាល់ថាមានទស្សនៈរិះគន់ចំពោះចិន។
មានរបាយការណ៍ថា ប៉េកាំងមានការត្រៀមខ្លួនកាន់តែប្រសើរក្នុងការដោះស្រាយជាមួយរចនាបថដឹកនាំបែបអាជីវកម្មរបស់លោក Trump និងក្រុមមន្ត្រីដែលមានមនោគមវិជ្ជាតឹងរ៉ឹងនៅពេលនេះ បើប្រៀបធៀបទៅនឹងអាណត្តិដំបូងរបស់លោក។
ចិនអាចនឹងព្យាយាមប្រើប្រាស់បណ្តាញទំនាក់ទំនងក្រៅផ្លូវការតាមរយៈបុគ្គលដែលមានចំណងមិត្តភាពជាមួយចិនក្នុងក្រុមរបស់លោក Trump ដូចជាលោក Elon Musk។ ខណៈដែលលោក Trump ផ្តោតលើការប្រកួតប្រជែងផ្នែកសេដ្ឋកិច្ចជាមួយចិន មន្ត្រីដែលត្រូវបានតែងតាំងរបស់លោកផ្តោតខ្លាំងលើកង្វល់ផ្នែកយោធា និងសន្តិសុខ។
ទោះជាយ៉ាងណា អ្នកវិភាគលើកឡើងថា វិធីសាស្ត្រទូទៅរបស់លោក Trump អាចនឹងធ្វើឱ្យគោលនយោបាយតឹងរ៉ឹងរបស់ពួកគេមានភាពទន់ភ្លន់ជាងមុន។
បញ្ហាប្រឈមសំខាន់ៗសម្រាប់ប៉េកាំងរួមមានពន្ធគយរបស់សហរដ្ឋអាមេរិក សក្តានុពលនៃការផ្តាច់ចេញពីគ្នា និងបញ្ហារសើបនានាដូចជាតៃវ៉ាន់។
លោក Rubio ដែលជាអ្នកគាំទ្រយ៉ាងមុតមាំដល់តៃវ៉ាន់ ធ្វើឱ្យទំនាក់ទំនងការទូតកាន់តែស្មុគស្មាញ ជាពិសេសដោយសារតែលោកត្រូវបានប៉េកាំងដាក់ទណ្ឌកម្ម។ ទោះបីជាមានទស្សនវិស័យដ៏លំបាកនេះក្តី អ្នកជំនាញជឿជាក់ថា លោក Trump នៅតែមានឆន្ទៈក្នុងការធ្វើកិច្ចព្រមព្រៀងជាមួយចិន ឱ្យតែវាស្របទៅនឹងគោលដៅសេដ្ឋកិច្ច និងយុទ្ធសាស្ត្រទូលំទូលាយរបស់លោក៕
